3650拍片即Send

3650拍片即Send
楊千嬅都話正
年尾諾記新機一部接一部，到底今次又有乜新賣點呢？大家毋須再估，因為新機加入了拍片功能，絕對好玩兼新鮮。以上所講就係諾記本年壓軸新機3650，今勻唔再硬銷影靚相，改為力谷短片拍攝，再以MMS方式送出，好似玩現場直播般，難怪連千同Edison都話好玩。

其實3650已經係諾記今年第二部Smartphone，佢用上7650的Series 60操作平台，所約以操控方面同7650相差無幾，用家唔怕太難適應。
約$4,000hk
圓形鍵盤夠復古


講起手機Keypad，3650就夠晒特別，圓形設計絕對有攪盤Feel，不過用家就要將多年來的按鍵習慣重新適應。手機另外加入了3系必玩的換殼功能，跟機的機殼會是深藍及銀色，而稍後就會推出紫、紅、藍及金四款顏色機殼。

除了兩項玩賣點外，手機還加入MMC卡插槽，儲相儲Java程式都方便得多，唔使受制於內置的4MB記憶體。接收制式方面就加入GSM 1900頻道，令用家一機幾乎可以走勻全世界。

影片儲存三十秒


3650跟7650同樣用上Symbian OS，所有7650的功能如影相、Java程式及藍芽等，都會在3650再次出現，不過藍芽依然只支援數據模式，藍芽Handsfree統統用唔到。3650支援拍攝短片，更肯定係GSM機第一部，短片格式為3GP，3GP無論檔案體積及質素都跟MP4相若，但兩者就並不兼容。

手機最多可拍下100KB的短片，長度方面就要視乎畫面內容而定，解象度為128×96，假如畫面複雜的話，就只可儲約十多秒，較簡單的畫面就可儲約三十秒。拍攝後的短片，就好似相片一樣，可以MMS、紅外線或藍芽方式送走，亦可儲在MMC 卡內。
六台MMS已經打通


可傳聲傳畫的MMS服務，推出至今已有八個月時間，早前就分為兩個陣營，只限陣營內的用家可以跨網互Send，對於普羅用家又真係有些少不便。

前日六大網絡商終於宣布可以互Send MMS，即係話大家在聖誕新年期間，只要有部MMS手機的話，就可以送個MMS去祝對方聖誕或者新年快樂，毋須再顧慮對方用邊個台，收費方面就跟網內互傳的收費一樣，暫時不會加收任何手續費。

目前的MMS可做到傳送文字、音樂、錄音及圖片等傳送，用上3650的話就更可做到短片傳送及接收，所以今次六台MMS及時互通真係一個好消息。

http://the-sun.com.hk/channels/av/20021221/

陌生的訪客 於 2015-05-25 07:52:02 修改文章內容